martes, 17 de marzo de 2020

O noso funcionamento durante a alarma por Coronavirus

Boas a todas,

Esperamos que ante todo o sucedido nos últimos días, vos atopedes ben, coidándovos e co mellor humor posible. Como xa sabedes, tocan tempos de quedar na casa, e na nosa cooperativa xa temos implementadas certas medidas de seguridade para poder desenvolver aquelas tarefas imprescindibles, posto que o noso traballo atende a demanda básica da recollida do refugallo dos contedores de aceite doméstico. Aquí vos explicamos polo miúdo  o protocolo de recollida:

- O traballo diario será realizado só por 4 traballadoras, 2 delas en ruta, efectuando o servizo de recollida e 2 nas nosas instalacións, encargadas das tarefas de baleirado e limpeza.

- O servizo de recollida farase, como é habitual, na nosa furgoneta. Nela irán só dúas traballadoras para poder manter en todo momento a distancia de seguridade de 1,5 m. En todo momento usarán luvas e mascarilla. Prestarase especial atención á limpeza das superficies que puidesen estar en contacto coas usuarias á hora de depositar os recipientes.

- O traballo de baleirado e limpeza será desenvolvido por 2 traballadoras ao día seguinte da recollida (mentras se realiza a ruta) para evitar a presenza de máis de 2 traballadoras en nave o maior tempo posible e manter a distancia mínima de seguridade de 1,5 m. Uso de luvas e mascarilla nos procesos de baleirado e limpeza.

- A limpeza dos contedores será ralizada con desengraxante e desinfectante como é habitual.

- Puntualmente poderán verse alterados os horarios de recollida habituais por mor da conciliación e
coordinación das traballadoras.

- Seguiremos realizando o servizo de recollida nos contedores instalados na vía pública dos concellos
de A Coruña, Arteixo e Cerceda.

- Puntos semipúblicos: Recolleremos, coa frecuencia habitual, nos supermercados do grupo Vegalsa-
Eroski da provincia da Coruña; Alcampo (A Coruña e Ferrol) e Centro Comercial Os Rosales. Tamén nos centros de ensino e AAVV que teñan o contedor fóra (xa que as instalacións estarán pechadas).

- Puntos privados: Mália estaren pechados a maioría de hoteis, restaurantes, bares e cafeterias seguiremos facendo a recollida naqueles que nolo demanden, por mor de limpezas xerais ou por
prestar, estes establecementos, o servizo de comida a domicilio.

Estaremos especialmente atentas ás demandas dos comedores e empresas de catering que están a
traballar pola nosa comunidade como é o caso da Cociña Económica, IBS Padre Rubinos, Fogar de
Sor Eusebia e Fogar de Santa Lucía.

Neste enlace podedes acceder ao documento no que figura esta información, por se vos fose de interese

Moitos ánimos a todas! Fagámonos eco das recomendacións para que podamos superar isto o antes
posible e o traballo das que están levando o peso da situación sexa máis levadeiro.

Unha forte aperta virtual de todo o equipo de Mulleres Colleiteiras

miércoles, 30 de octubre de 2019

Actualizando o blogue e comunicándovos novidades!

Boas, compas!

Se nos seguides por outras redes sociais, saberedes que neste último ano estamos a ter moitísimas actividades de difusión. Estamos ampliando a rede, coñecendo moitas outras iniciativas de fomento da economía circular e que poñen o foco nas persoas. O noso blogue non estaba sendo espello de toda esta actividade, e agora comezamos  un proceso de mellora, engadindo novas funcións e contándovos algunha que outra nova. É por iso que agora dende aquí podedes consultar o noso facebook e twitter, que aparecen despregados no lateral dereito desta plataforma. Para ver as nosas imaxes de instagram, ao final desta páxina de novas podes acceder a elas.

Imaxe de El País, Oscar Corral


Moitas grazas por lernos, e para rematar deixámosvos con este artigo publicado no diario El País, no que se afonda na nosa traxectoria. Nel publicouse a foto que podes ver arriba, na que saímos o equipo actual do que xa formamos parte cinco mulleres.

Ata a próxima e vémonos reciclando!

viernes, 21 de septiembre de 2018

AMPLIAMOS OS PUNTOS DE RECOLLIDA



Boas a todas!




Queremos compartir con todas e todos vos esta boa nova! Ampliamos a recollida de aceite vexetal usado a 23 contedores novos por toda a cidade de A Coruña, é dicir, contamos xa cun total de 65!! 
A localización de estes puntos novos foi posíbel grazas as demandas veciñais que se achegaron a través dos orzamentos participativos. Non podemos estar máis contentas e agradecidas a toda a cidadanía pola súa resposta dende que no ano 2016 comezamos este labor tan fundamental para o coidado do medio ambiente. Os números abalan esta maior concienciación da cidadanía na reciclaxe deste residuo tan contaminante, xa que en 2017 recollemos un total de 43.994 kg de aceite nos contedores públicos instalados, e nos primeiros oito meses deste ano 2018 xa superamos esa cifra, chegando aos 45.161,05 kg. 
Dende Mulleres Colleiteiras creemos que o incremento destas cantidades vai ser gratamente exponencial coas novas posibilidades e facilidades que se lles abre aos cidadáns de A Coruña coa incorporación destes 23 novos contedores. E como non pode ser de outra maneira, todas as traballadoras desta cooperativa énchenos de ilusión e motivación poder atender cada vez máis á demanda de este servizo.
Por último, queremos indicarvos que no apartado de ‘Recollida de Aceite’ deste blogue temos un mapa con todos os puntos actualizados onde se atopan localizados os contedores.

Moitas grazas aos que facedes posible estas boas accións e recordade...a reciclar !

martes, 8 de mayo de 2018

Somos noticia!

Bo día, tarde e noite a todas!
foto de Ángel Manso para La Voz de Galicia
Nos últimos meses a nosa cooperativa está a ser motivo de interese para diferentes medios de comunicación. Isto é un motivo de orgullo para nós e o noso traballo, posto que todas estas canles de difusión acercánnos a todas e todos vós. Cremos na necesidade da implicación cidadá para conseguir chegar a unha reciclaxe do aceite vexetal usado que respecte as necesidades do medio ambiente, de maneira que sexa económica e socialmente sostible.

É a través do coñecemento da historia da cooperativa de Mulleres Colleiteiras, e das mulleres que particularmente a formamos día a día, que nos gustaría chegar ás vosas casas. A nosa profesión é unha suma de pequenos esforzos, e grazas ás novas que vos contamos a continuación tentaremos contárvolas polo miúdo.

Quizais a través da entrevista que lle fixeron á nosa compa Susana Liaño na Cadena Ser poderedes coñecer un pouquiño máis. Ou pode que queirades acompañarnos na nosa ruta no programa Galicia Viva (consultade o minuto 38!). E se o preferides, tamén podedes achegarvos ás novas que nos adican en adiante.gal e na Voz de Galicia para afonda na vida diaria das socias. Todo este traballo vese reflexado tamén na nosa nominación no concurso Héroes Verdes, na que podedes votar a nosa proposta.

Para rematar, queremos darvos as grazas. Grazas porque todo este esforzo está comezando a dar os seus froitos. É así que neste último ano temos cuadriplicado a cantidade de aceite que estamos a recoller nos puntos habilitados. E isto, sen dúbida, é o mellor premio que se nos pode dar.

jueves, 8 de marzo de 2018

Celebramos o noso aniversario sumándonos á folga 8M





Boas a todas!

Hoxe, 8 de marzo, na Cooperativa Mulleres Colleiteiras estamos de celebración. Por un lado cumplimos cinco anos da nosa fundación. Son xa moitas as persoas que nos coñecedes e apoiades o noso traballo dende 2013. Para este 2018 esperamos seguir chegando ás vosas casas para contaxiarvos a necesidade de coidar o noso medio ambiente. Para iso traballamos día a día recollendo o voso aceite doméstico usado e dedicamos parte das nosas forzas á difusión desta tarefa fundamental.

Ademais, como cooperativa que persegue unha repercusión social, tamén apoiamos a folga do día de hoxe. É por iso que hoxe:

Non traballamos
Non estudamos
Non consumimos
Non coidamos

Paramos porque se as mulleres paran, párase o mundo.
Paramos para darlle voz a unha inxustiza.
Paramos para darlle visibilidade a unha opresión.
Paramos para darlle luz ao medo.
Paramos para compartir, soñar, loitar e acadar un lugar máis xusto para todas as nenas e mulleres. Un lugar mellor para todas as persoas.

Como os nosos compañeiros nesta loita, animamos tamén a tódolos homes a sumarse co seu apoio.

Vémonos nas rúas!

viernes, 29 de diciembre de 2017

Para rematar o ano... difundimos en centros educativos


Durante os últimos meses estamos a realizar charlas divulgativas por varios centros educativos de A Coruña, Oleiros e Santiago de Compostela. Durante estas sesión damos a coñecer o noso traballo, concienciando ao alumnado e ao corpo docente sobre a importancia do reciclaxe do aceite xerado nas nosas vivendas.
Esta actividade, a cal pretendemos retomar con forza e coa cal seguir mellorando as nosas capacidades comunicativas e a implicación do sector educativo do país está a ser fructífera. As máis pequenas mostran un enorme interese polo proceso, involucrándose como cidadás da responsabilidade da correcta xestión dos residuos. Isto fai que vexamos unha enorme potencialidade nas escolas e institutos, onde rapazas e rapaces asumen a tarefa do reciclaxe de aceite como unha mellora na calidade da nosa sociedade, ao perservar un ben común tan preciado como é a auga.


Con moito traballo e esforzo continuamos co proceso, incorporando todas as experiencias novas  e melloras que estamos a aprender! 

martes, 26 de diciembre de 2017

A formación, grande aliada durante as nosas difusións

Dende finais do verán, co comezo do novo ano escolar, estivémonos a preparar unha charla didáctica para ir a centros educativos onde dar información e concienciar ás máis pequenas e pequenos acerca do reciclado do aceite doméstico. Para isto, preparamos diverso material, como presentacións adaptadas ás diferentes idades, vídeos explícativos do noso traballo, carteis, etc…

Detrás de cada exposición tamén existe un traballo de formación das nosas capacidades de expresión, coas que facer chegar mellor a nosa mensaxe. Esta formación consistiu en diversos ensaios e preparación antes da posta en escea, nos cales simulamos distintas situacións. Con elo chegamos a darnos conta da importancia que ten  esta parte do noso traballo e tarefas diarias. Non soamente recollemos o aceite, senón que é moi importante reforzar as nosas habilidades comunicativas e comerciais á hora de poder explicar o que facemos e a importancia da nosa labor.

Seguimos a aprender día a día, cunha experiencia que está a ser moi enriquecedora para todas!